FAALAUILOAINA O FAAILOGA SAMOA I MATĀTĀ O LE FAAKAMUTA & FAIPUSA AISA & EA MALULŪ

SAMOA, March 28 - SAUNOAGA AUTU a le Minisita o Aoga ma Aganuu ia Seuula Ioane [Aso Faraile, 28 Mati, 2025]

Susu lau Susuga i le Ta’ita’i o le Sauniga, Susuga

Reverend Professor. Vaitusi Nofoaiga

Susu susuga i Faafeagaia o loo faauluulu iai Aoga

Faaauau faapea sui auai

Afifio Fa’auluuluga o Matagaluega ma

Fa’alapotopotoga a le Malo

Afifio Fa’auluuluga o Kamupani ma Pisinisi

Afifio Faauluuluga o Asosi Taualoa a Samoa

Afifio le ma’ave eseese o le Au vala’aulia

Talofa, Talofa Lava!

E talitonu o lea ua fa’ae’e i lumāfale ma fata i paepae sā o Samoa, o pāia fa’aufigatā ma mamalu o lenei taeao, e pei ona faailoa e le fofoga o le aso.

O lea fo’i ua mae’a ona mua mea I Matā’utu Sā ma tapui sā o lo tatou Vā Tapuia ma lo tatou Māta’isau Sili o le Foafoaga, e pei ona manavaina e lana auauna totofi.

Ae o le a faga tonu le malama ma vili tonu le ifi a maina i le auga ma le faamoemoe o lenei aso, e faia ai se faamatalaga e tatala aloaia ai le fa’alauiloaina o Fa’ailoga Samoa ma Agava’a Aloa’ia i Matata Faa Kamuta ma le So’o Uamea, ma le Fai Pusa Aisa ma Ea Malulu.

O le asō, ua tatou molimauina ai le faamaeaina o se tasi o galuega sa feagai ma le Pulega o Faailoga ma Tusi Pasi Taualoa a Samoa, faapea i latou ua iai le tomai ma le silafia i le lauliliuina ma le iloiloina o Faailoga Samoa ma Agava’a Aloa’ia i Matatā o le Faa Kamuta ma le So’o Uamea, ma le Fai Pusa Aisa ma Ea Malulu. (Samoa Qualifications in Carpentry & Joinery, Refrigeration & Air Conditioning). Ma o nei Faailoga Samoa ua maea ona resitalaina i luga o le Faatulaga o Faailoga ma Tusi Pasi Taualoa a Samoa.

O galuega nei a le Pulega, o lo’o faatonutonuina i ana matāfaioi i totonu o le Tulafono 2010, faatasi ai ma Fuafuaga a le Vaega o A’oa’oga “ina ia aoaoina uma tagata Samoa ma galulue ia fua mai”.

O loo faamauina fo’i le faataua o nei galuega i totonu o le Fuafuaga Alualu Mamao mo le Vaega o A’oa’oga Fa’aauau 2020-2024 ma le Fuafuaga Autasi 2025-2027 a le Pulega o Faailoga ma Tusi Pasi Taualoa a Samoa.

O Faailoga Samoa ma agava’a aloa’ia o le a faailoa aloaia i le asō, o le tali atu lea o le Pulega i Vaega Faamuamua lona tolu o le Ta’iala mo le Lumana’i Manuia o Samoa mo le Tausaga Faaletupe 2021/2022 se’ia o’o atu i le 2025/2026 “mo “a’oa’oga lelei”.

O le naunautiga ma le fa’amoemoe o le Pulega, ina ia siitia maualuga le tulaga o tomai ma agava’a e a’oa’oina ai alo ma fanau i matātā o le faa kamuta ma le Fai Pusa Aisa ma Ea Malulū i totonu o Aoga Fa’aauau ma Aoga Pupu’u, ina ia mautinoa le ausia o le tulaga aupito sili ona lelei ma le atoatoa, ina ia faamalie ai manaoga mo agavaa manaomia ma le talafeagai i totonu o fale faigaluega.

E le toe faamatalaina pe faailoaina fo’i le telē o le sao taua o agava’a i Matatā nei i le faaleleia o atinae i totonu o aiga ma nuu, aemaise o le tali atu ai i manaoga i aso fai so’o mo ni galuega faaleleia poo auaunaga e moomia ai agava’a e pei ona faailoa i lenei aso.

Ma e talitonu le Pulega, o le unaia ma le faamalosia o “a’oa’oga lelei”, faapea le siitia o le tulaga o aoaoga, o le matafaifoi fai faatasi a le Pulega o Faailoga ma Tusi Pasi Taualoa a Samoa ma Aoga Faaauau, faapea i latou o loo faatautaia a’oa’oga pupu’u, aua se lumanai manuia o alo ma fanaua a Samoa, aemaise o le siitia o le tulaga o tomai ma agavaa manaomia mo tagata faigaluega o si o tatou atunuu.

E faaleoina ai le agaga o le faafetai i pa’aga o loo faatupeina nei galuega mai le malo o Ausetalia ma Niu Sila e tauala mai I le Vaega o Aoga (Budget Support).

Momoli fo’i le faafetai i le komiti (review panel) na galulue i le lauliliuina ma le iloiloina o Faailoga

Samoa, faapea sui uma o komiti faufautua (Sector Advisory Group) ma komiti na galulue mo le resitalaina o Faailoga i luga o le Faatulagaga o Faailoga ma Tusi Pasi Taualoa a Samoa (Qualifications Registration Panel). Ia faamanuia le Atua i galuega fitā sa feagai ai ma komiti taitasi.

E le faagaloina fo’i le faafetai mo a tatou Aoga Fa’aauau ma Aoga Pupu’u i le latou pito laau i le a’oa’oina o fanau aemaise o fale faigaluega ma tagata faigaluega mo le siitia o le tulaga o a’oa’oga ma agavaa manaomia mo le manuia o atina’e o Samoa.

O le faafetai mo le Komiti Faatonu, o le Pulega ma le aufaigaluega a le Pulega o Faailoga ma Tusi Pasi Taualoa a Samoa mo galuega lelei uma ua faatinoina e pei ona molimauina i le asō.

Faafetai tele i le paia o Samoa ua potopoto mai i lenei aso i le faaavanoaina mai o outou taimi taua e molimauina le faamoemoe o le asō.

Faamanuia le Atua i le faagasologa o le polokalame i lenei aso

Soifua ma ia Manuia!

Ata Pueina – Malo o Samoa (Taunuuga Toatasi)

April 10, 2025