FA’ALAUILOAINA & TUFATUFAINA O MEAFAIGALUEGA MO MAKETI TU AUALA A FAIFA’ATOAGA MA FAIPISINISI LAITI I UPOLU

SAMOA, April 14 - SAUNOAGA AUTU a le Afioga i le Minisita o Fa’atoaga & Faigafaiva – Hon. Niuava Eti Leatiogie Malolo Funefeai (Aso Lua 15 Aperila 2025)

Susuga i le Fa’afeagaiga Komisi Samuelu, EFKS, Fugalei,

Afioga ia Mr Guangzhou Qu, Fa’atonu o le FAO mo Atumotu o le Pasefika,

Malo fa‘aaloalogia, Faipisinisi o Faleoloa i le auala, Sui o Faifaatoaga ma Paaga,

O se fiafiaga tele ma le agaga fa‘afetai oute tula’i ai ma le fa’aaloalo, i le fa‘alauiloaina aloa‘ia ma le tufatufaina o meafaigaluega mo maketi tu auala mo nai a tatou faifa‘ato‘aga ma faipisinisi laiti i Upolu nei.

O lenei fa’amoemoe e le gata ina o se tufatufaga o meafaigaluega, ae o se la‘asaga taua i lo tatou galulue felagolagoma‘i e unaia ai le vaega ma’oti tau fa‘ato‘aga i si o tatou atunu’u.

O maketi tu auala, o nisi ia o vaaiga ua masani ai le tele o nu’u ma afioaga. E amata mai i le pisi o ala tetele i Apia seia o’o atu i auala i nu’u i tua, o lo’o vaaia pea le tele o maketi laiti tu auala.

Ma o nei maketi ua avea ma auala e feso’otai ai faifa’atoaga ma le mamalu o le atunu’u fa’atau, ua maua ai fua o fa’aeleeleaga soifua maloloina mai i laufanua ma le gataifale mo le fofoga taumafa. Peita‘i, o le tele o nei maketi tu auala e leai ni fausaga ma‘oti, ma e a‘afia tele i timuga ma mugala, ma i’u ai i le fa’aleagaina o oloa fa’atau atu.

O le asō, e ala i le fesoasoani a le Iuni a Europa (European Union), ma le lagolagosua a le Fa’alapotopotoga o Taumafa ma Fa‘ato‘aga a le Lalolagi (FAO), ua tatou fa’atino ai se la‘asaga taua i le fesoasoani atu i lu‘itau o lo’o feagai ma maketi tu auala.

O meafaigaluega uma o le a tufatufaina atu, o le a fesoasoani lea i nisi o nei pisinisi, ina ia mafai ona latou fa’atauina atu fua o fa’aeleeleaga mama ma saogalemu i le taumafa.

O lenei polokalame, o lo’o ogatasi lava ma manulauti o fuafuaga alualu mamao a le tatou Malo, ia fa‘atupulaia se tamaoaiga gafataulimaina, si’itia le soifuaga o nu‘u i tua, ma fa‘asafua se manuia mo tagata uma.

E momoli le fa‘afetai tele ma le fa‘amalo i le Asosi o Faifa‘ato‘aga i Samoa (SFA) mo lo outou sao i le fa‘atulagaina o lenei galuega taua.

Mo a tatou paaga faifa‘ato‘aga ma pisinisi maketi tu auala – o outou o le fatu o lenei polokalame. O lenei fesoasoani o se fa‘ailoga o le fa’ataua o lo outou sao i aso uma, i le fa’atauina atu o fua o f’aatoaga ma le gataifale mo le mamalu o le atunu‘u, aemaise tupe maua mo lo outou manuia.

O lenei polokalame o le a fa’apea fo’i ona faia mo le motu i Salafai i le vaiaso fou. O le naunautaiga lava ina ia si’itia le tulaga tau maketi tu auala. E le gata i le maua ai o feso’otaiga o faifa’atoaga ma le mamalu o le atunu’u, ae ia mama ma saogalemu meafaigaluega mo nei maketi.

I lenei itula, ou te toe momoli atu le fa‘afetai tele i le Iuni a Europa mo le fesoasoani tau tupe, fa’apea le FAO mo le galulue fa’apaaga ma le tatou Matagaluega o Fa’atoaga ma Faigafaiva, ma i latou uma na tofu sao i le ausia o lenei taunu‘uga tāua.

Ia tatou fa‘aauau pea le galulue fa‘atasi, tatou faifa‘ato‘aga, faipisinisi, le tatou Malo, pa‘aga ma nu‘u, e fausia ai se Samoa manuia ma soifua maloloina o tatou tagata.

Fa’afetai, soifua ma ia manuia.