FAAMANATUINA O LE 140 TAUSAGA O LE AOGA FAAFOMAI A FITI [20 Novema 2025]
SAMOA, November 20 - SAUNOAGA FAAPITOA a le afioga i le Tamaitai Sui Palemia ia Mulipola Anarosa Ale Molioo
Lau Susuga i le Ta’ita’i o le Sauniga Rev Tavita Reupena
Afioga i Minisita o le Kapeneta
Faauluuluga o Matagaluega ma Faalapotopotoga a le Malo
Aemaise sui mamalu uma o le FSM Alumni i Samoa.
O lea ua uma ona mua mea i Matāutusā e pei o le tala ia Moa’ula, ma fa’afo’i lapalapa o mālō i Foga’a ‘auā le Atua ma lona agalelei. E moni lava, o ni lavasiga ma fuafuaga i le tōfā na a’e ia i latou na faatinoina lenei faamoemoe, a’o fōlauga a le sōama, e failā tū i le ama i le pule a le Silisili’ese. Ae fa’afetai o lenei ua a’e ma le mālō, ua o tatou fetaia’i i nu’u ao ae le o nu’u po.
O lea fo’i ua mae’a ona tofī tofā le la’au a le tamaita’i, e tusa o pa’ia fa’aufigatā o Samoa, lea ua mae’a papae fa’aulufanua e le fofoga o le aso. Ua mamanu la fa’atiti o poula mamalu o le taeao pa’ia ma le maualuga, e le toe ta vavaeina i se fa’amatalaga, ‘auā o Samoa o le atunu’u tofi, e le taliola pe talatau e pei o Toga, o le fale fo’i o Po ma Ao ua so’o lona ta’iao ma e tulutulu i tao. Fa’ata’alolo la pa’ia ia. A o lenei aso, o le a su’i tonu le mata o le niu ma aga’i se manatu e tusa o le fa’amoemoe o lenei aso.
O le asō, o lea ua tau ai ‘ai o lapega e pei o upu e fai i faiva o tapalega, ma o lea fo’i ua tapisi i liu o va’a le i’a a le tautai na augani e fia sisi ma ua lelepa ai nei foe a tautai o le vasa, se’i o tatou aleaga aua o lea ua tau lau o le faamoemoe. O le faamanatuina lea o le 140 tausaga talu na faavaeina le Aoga Faafomai i Fiti mai le tausaga e 1885 – 2025.
A toe manatu i ai e le ose taimi laititi le sao ma le aoga o lenei aoga i le atinaeina o Samoa. E talitonu le manatu, ua fai i lagi le tuligasi’a a nisi o tama matutua ma tina matutua na uluai asaina le vaofilifili aua tupulaga faimai a Samoa e ala i le aotauina i vaega eseese o le soifua maloloina i lenei laumua. O le vaai ma le silasila atu a le malo o le tele o le aufaigaluega a le Matagaluega o le Soifua Maloloina sa a’otauina i le FSM mai tausaga ua alu.
O le manu lauti a le malo i ana fuafuaga alu mamao ina ia lava fomai, tausimai, , tagata faapitoa e tapenaina vailaau mo togafitiga, ma so’o se itu ma vaega uma o le Soifua Maloloina.
O le faamuamua a le malo ia siitia le soifua ma le ola maloloina o ona tagata uma i soo se vaega, e ala i le fausiaina o Falemai Fou i nisi o Afioga ina ia mafai ona maua ai le fesoasoani muamua pe a manaomia. E tele tapenaga a le tatou malo ina ia lelei falemai, lava fualaau ma vailaau mo togafitiga, lava le aufaigaluega ma faigaluega fiafia e tautua Samoa i soo se vaega faalesoifua Maloloina.
O le tuualalo a le Afioga a le Palemia, Kapeneta ma le faigamalo ia lelei le faatinoina o la outou auaunaga ia Samoa. O le avea ai o outou ma fomai, tausimai ma soo se vaega o le soifua maloloina o la outou lea ‘muai faauuina’ sa outou omai ma outou mai le lagi. O Iesu Keriso lava ia, o le fomai o fomai, e malolo uma i ai tagata e sulu atu i lona apitaga. E le faigofie la outou pitolaau, ae matou te mautinoa ua lava tapena outou e le Atua i lo outou valaauina. Ia maloloina Samoa atoa i lo outou afu sisina i le ao ma le po.
E fai ai lo’u leo faatauvaa ma fofoga taumolimoli o le Afioga i le Palemia, Kapeneta ma le faiga malo matou te faapea atu ai,
‘IA MANUIA TELE LE FAAMANATUINA O LE 140 TAUSAGA O LE AOGA FAAFOMAI I FITI UA FAAMANATUINA I SAMOA NEI’
Ia faamanuia mai le Atua I lenei aso ma ona taualumaga uma.
SOIFUA MA IA MANUIA
November 20, 2025Legal Disclaimer:
EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.
